- O'yin haqida fikringiz?
- Birinchi navbatda gollarga boy o'yin ko'rdik. O'ylaymanki, muxlislarga juda yoqdi. Birinchi bo'limda ko'proq himoyaga etibor qaratdik, ikkinchi taymda esa hujumga urg'u berib g'alaba qozonishni xohladik. Ammo oxirgi daqiqalarda gol o'tkazib g'alabani boy berib qo'ydik.
- O'yin davomida ko'rdikki, "Sho'rtan" har qanday vaziyatdan chiqib keta olishini ko'rsatdi. Qiyin holatda hisobni tenglashtirdi, keyin hisobda oldinga chiqib oldi va oxirida yana gol o'tkazib, ammo yutqazmadi. Shu payt ichingizdan nimalar o'tdi?
- Futbolchilarga har doim oddiy xatoga yo'l qo'ymaslikni uqtiramiz. Keraksiz joyda qoida buzmaslikni doim aytamiz. Afsuski, bugun shu kabi xatolar sabab g'alaba qozona olmadik.
- Bugun o'zbek futbolida yangi tarix yaratildi. Yani ilk bor Superliga bahsini ayol hakamlar boshqarib bordi. Bu borada fikringiz?
- Iliq fikrdaman. Baribir xayoldan ayol hakamlar boshqarsa xato ko'p bo'ladi, vahimaga tushib qolish holati kuzatilsa kerak degan fikr o'tadi. Lekin o'yinda ko'rdikki, hakamlar yaxshi ishlashdi. To'g'ri, qaysidir holatda xato bo'lgan bo'lishi mumkin, lekin umuman olganda ayol hakamlarimiz uchrashuvni yaxshi boshqarishdi.
- Mana mavsum ham tugadi. Endigi rejalar qanday?
- Afsuski, Proligaga tushib ketdik va jamoani yana Superligaga qaytarishimiz kerak. Klubimiz rahbariyati klub uchun astoydil mehnat qilmoqda. Men ham jamoada qolib "Sho'rtan" uchun bor kuchimni berib ishlashda davom etaman. "Sho'rtan" Superliga darajasidagi jamoa, kelasi yil yana qaytishimiz kerak.
- "Sho'rtan"ni qabul qilishga nima turtki bergandi, vaholanki jamoa oxirgi o'rinda edi?
- Har bir murabbiy jamoani ko'tarish maqsadida ish boshlaydi. Men ham shu maqsadda kelganman. Eng muhimi, qo'lni tushirmasligimiz kerak edi. Menimcha, oxirigacha kurashdik deb o'ylayman. Yarim mavsumdan beri jamoa bilan birgaman va bir-birimizni ancha yaxshi tushunib oldik.
