Дортмунднинг "Боруссия" клуби ҳужумчиси Эрлинг Холанднинг отаси Альф-Инге Холанд ўғлининг келажаги борасида ўз фикрларини билдириб ўтди.
"У "Боруссия"да ўз ўйинини намойиш қилаётганидан жуда ҳам хурсандман. У ўсишдан тўхтаб қолмаслиги муҳим аҳамиятга эга. Эрлингнинг тақдирини юздан ортиқ клуб билан боғлашмоқда. Менинг фикримча, унга Испания чемпионати мос келади. У ерда ажойиб жамоалар йиғилган.
Аммо қачондир у Ла лигага ўтадими ёки йўқми — номаълум. Кўрамиз. Ўғлимга Мартин Эдегор билан бирга ўйнаш ёқади. Улар бир-бирларини яхши тушунишади", - деди Альф-Инге Холанд "AS" нашрига берган интервьюсида.
Эслатиб ўтамиз, ҳуқуқий жиҳатдан "Реал"га тегишли бўлган Эдегор айни пайтда "Реал Сосьедад"да ўйнамоқда. Боз устига, Холанднинг ўзига ҳам "Реал" томонидан қизиқиш мавжуд.
