Рустам Лутфуллин ОФКнинг Ёш ҳакамлар академиясида таҳсил олмоқда

  • Mr.NoBoDy21.02.2019 17:32
  • 1541
  • 30

Шу йилнинг 24-26 февраль кунлари Малайзия пойтахти Куала-Лумпур шаҳрида Осиё футбол конфедерацияси томонидан ташкил этилган Ёш ҳакамлар академиясида дастлабки ўқув курслари ташкил қилинди. Мазкур курсларда юртимиз вакили Рустам Лутфуллин ҳам иштирок этмоқда. Ёш ҳакамлар учун академия ташкил этилиши келгусида нафақат Осиёда, балки жаҳон биринчиликларида ҳам бир қатор нуфузли мусобақаларда ишлайдиган, муҳим учрашувларни бошқарадиган кўплаб малакали ҳакамларни тайёрлашга замин яратади.

Ушбу академияда таҳсил олаётган ёш ҳакамлар орасида ОФКга аъзо барча мамлакатлар вакиллари бор. Ўқув курслари давомида футбол қоидаларига киритилган ва киритилиш кутилаётган ўзгаришлар ҳақида иштирокчиларга маълумотлар бериб борилмоқда. Шунингдек, футболда рўй берадиган баҳсли вазиятлар акс этган видеоклиплар намойиш қилиниб, бундай вазиятларда қандай қарор чиқариш зарурлиги ўргатилмоқда. Бундан ташқари, ўқув курслари иштирокчилари ўзлари ҳам майдонда амалий машғулотларда иштирок этиб, бу машғулотлар видеотасвирга олиняпти. Кейин мазкур тасвирлар иштирокчиларнинг ўзларига намойиш қилиниб, хатолар таҳлил қилинмоқда.

Яна бир жиҳатни таъкидлаб ўтиш зарур. Ушбу ўқув курсларини олиб бораётган инструкторлар орасида ўтган йилги Жаҳон чемпионати ва бу йилги Осиё Кубогида ишлаган ҳамюртимиз Фарҳод Абдуллаев ҳам бор.



Манба: Ўзбекистон футбол ассоциацияси расмий сайти.

Ўхшаш янгиликлар