Жуфтакни ростлашнинг айни пайти

  • Mr.NoBoDy 24.01.2023 21:50
  • 2532
  • 30

Рим жамоаси Элдорга сарфланган пулларни максимал даражада қайтариб олмоқчи.


   2021 йилнинг 3 августи ўзбек футболи ишқибозлари учун унутилмас, қувончли кун бўлганди. Ўшанда юртдошларимиз, Элдор Шомуродовнинг Римнинг «Рома»си билан 5 йиллик шартнома имзолаганидан роса хурсанд бўлишганди. 


Бугун эса 2023 йилнинг 24 январи, Европада трансфер олди-сотдиси якунланишига роппа-роса 7 кун қолди. 2 йил аввал Элдорнинг «Женоа»дан «Рома» сафига бориб қўшилишини қанчалик хоҳлаган бўлсак, бугун футболчимизни Римни тарк этишини шунчалик истаяпмиз. Нима ҳам дердик, ўтган вақт ичида Элдор асосий таркиб футболчисига айлана олмади, Жозе Моуринё ишонч билдирмади. Португалиялик мутахассис ҳали бери Римдан кетадиганга ўхшамайди. Демак шуниси аниқки, Шомуродов жамоада қоладиган бўлса, буёғига ҳам захира ўриндиғи стулларини иситишда давом этади. Ўзи аслида Жозе ҳам ватандошимизнинг жамоада қолишига қарши бўлмаса керак, негаки Шомуродов ҳужумнинг исталган нуқтасида ҳаракат қила олиш хусусиятига эга ва энг муҳими Элдор ички муҳитни бузувчи футболчилар сирасига кирмайди. Футболчимизга ҳозирда Италиянинг «Торино», «Кремонезе», «Специя», Франциянинг «Лилл», Испаниянинг «Валиядолид» ва Германиянинг «Байер» жамоаларидан қизиқиш борлиги айтилмоқда. Билишимизча бу жамоаларнинг айримлари римликларга расмий таклиф билан чиқишган, айримлар эса шунчаки қизиқишнинг ўзигина бўлиши мумкин. Элдорнинг ўзи ОАВ берган интервьюларида «Рома»дан кетишга қарши эмаслигини билдирган. Ҳамма гап «Рома» раҳбариятида. Рим жамоаси Элдорга сарфланган пулларни максимал даражада қайтариб олмоқчи. Биласиз, клуб футболчи трансферига 18 миллион евро атрофида сармоя жалб қилган. Элдорни ўз жамоасида кўришни истовчилардан талаб қилинаётган сумма 13, 14 миллион евро атрофида. Биргина «А» церийа аутсайдери «Кремонезе»гина шунча пулни беришга рози эканлиги айтилмоқда, лекин футболчи қуйи лигага тушиб кетиш эҳтимоли юқори бўлган жамоага ўтмоқчи эмас. Келишув амалга ошиши учун 3 ла томоннинг фикри бир нуқтада бирлашмоғи лозим.

Шомуродов «Рома»да қолса нима бўлади?


Агарда Элдор римликлар сафида қоладиган бўлса, юқорида айтканимиздек захира ўриндиғи стуллари иситилишда давом этилади. Табиийки вақтини захирада ўтаказадиган футболчининг трансфер баҳоси пастлайди. Ўйин амалиётининг йўқлиги, футболчи спорт формасига жиддий таъсир ўтказади. Оқибатда таклиф тушаётган жамоаларнинг сони ҳам савияси ҳам камаяди.

Жуфтакни ростлашнинг айни пайти.


Элдорнинг ҳозирда 28 ёшда эканлигини инобатга олсак, кетишнинг айни пайти. Футболчи кучли чемпионатларда ўзини кўрсатишни истаса, тезроқ отга қамчи урмоғи лозим. Ҳозирда даражаси кучсизроқ бирор жамоага ўтиб, кейинчалик ўзини кўрсатган ҳолда яна топларнинг эътиборига тушса бўлади. Шомуродовнинг потенциалини яхши биламиз. Ҳужумчи ўртамиёна жамоаларнинг голеадор ҳужумчиси вазифасини бемалол уддалай олади (худди «Женоа»дагидек).

Ҳаммаси бир томонга ҳал бўлишига яна 7 кун бор.


Жалолиддин Халилов.

Ўхшаш янгиликлар