2025 йил АҚШда ўтказиладиган клублар ўртасидаги жаҳон чемпионатида иштирок этадиган навбатдаги жамоалар номи маълум бўлди.
Европа клублари учун ажратилган 12 та квотанинг сўнггиси Австриянинг "Зальцбург" жамоасига насиб этди.
Аслида ушбу йўлланма жорий йилги Европа Чемпионлар лигаси ғолибига тақдим этилиши керак эди, бироқ мусобақа ярим финалига йўл олган тўрт гигантнинг барчаси жаҳон чемпионати йўлланмасига эга чиқиб улгуришган. Шу боис, мазкур ўрин сўнгги тўрт йил ичида энг натижа кўрсатган ва ҳали мундиалда иштирок этмаган жамоага тақдим этилиши кўзда тутилганди. Мамлакатлар бўйича тақсимланган лимитлар сабаб Австрия клубидан юқорироқда турган баъзи клублар Америкага бора олмайди.
Шунингдек, Осиё футбол конфедериясидан Жанубий Кореянинг "Ульсан Хёндэ" клуби қитъа жамоалари орасида энг яхши коэффициентга эга бўлгани сабабли мусобақага йўл олади. Яна бир чипта эса Осиё Чемпионлар лигасининг жорий йилга ғолибига туҳфа этилади.
