"Бока Хуниорс" ҳужумчиси Эдинсон Кавани клуб билан янги шартнома имзолади.
37 ёшли футболчининг шартномаси 2026 йилнинг охиригача мўлжалланган, дея хабар беради клуб матбуот хизмати. Уругвайлик футболчи 2023 йилнинг июлидан бошлаб "Бока Хуниорс"да.
Аргентинага кетишдан олдин Кавани Испаниянинг “Валенсия” клубида бир йил ўйнаган, аввалроқ эса икки йилни Англиянинг “Манчестер Юнайтед” клубида ўтказган.
Форвард фаолиятидаги энг муваффақиятли йилларини Франциянинг "Пари Сен-Жермен" (2013-2020) ва Италиянинг "Наполи" (2010-2013) клубларида ўтказган. “Бока Хуниорс” таркибида футболчи 43 та ўйинда майдонга тушиб, 20 та гол урди.
