“Интер Майами” клубининг афсонавий аргентиналик футболчиси, саккиз карра “Олтин тўп” соҳиби Лионель Месси ҳаётида кўрган энг яхши футболчи ким эканини маълум қилди.
“Роналдо — феномен эди. Мен кўрган барча футболчилар орасида у энг яхшиси бўлган. Қайси томондан қараманг, у ҳайратланарли ўйинчи эди”, дея Мессининг сўзларини келтиради Sport Bible нашри.
Маълумот учун, Роналдо ўзининг ажойиб тезлиги, техникаси ва ҳужумларни самарали якунлаши билан машҳур бўлган. У профессионал фаолиятини “Крузейро” клубида бошлаган, кейинчалик “ПСВ”, “Барселона”, “Интер”, “Реал” ва “Милан” клубларида ўйнаган.
Бразилиялик футболчи икки марта “Олтин тўп” (1997, 2002) соҳиби бўлган. Шунингдек, у икки карра жаҳон чемпиони бўлган (1994, 2002). 2002 йилда Роналдо турнирнинг энг яхши тўпурари бўлиб, Бразилиянинг ғалабасида ҳал қилувчи рол ўйнаган. Бундан ташқари, у Америка Кубоги ва Конфедерациялар Кубогини қўлга киритган.
Унинг футболчилик фаолияти 2011 йилда якунланган.
