"Real" yarim himoyachisi Braim Dias jarohati sababli Ispaniya La Ligasi 36-turida "Malorka"ga qarshi o'yinda maydonga tushmasligi malum bo'ldi. Bu haqda AS nashri xabar bermoqda.
Ispaniya chempionatining 35-turida "Barselona"ga qarshi o'tkazilgan o'yinda (3:4) futbolchi chap son mushagini shikastlagan. U noqulaylik sezishiga qaramay, o'sha uchrashuvni oxirigacha o'ynab tugatishga erishdi. "Real" murabbiylar shtabi ehtiyotkorlik chorasi sifatida yarim himoyachini keyingi o'yin qaydnomasiga kiritmaslikka qaror qilgan. Dias 18 mayda "Sevilya"ga qarshi o'tkaziladigan 37-tur uchrashuvini ham o'tkazib yuborishi ehtimoldan xoli emas.
Braim Dias joriy mavsum 50 ta o'yinda maydonga tushib, 6 ta gol urgan va 7 ta golli uzatma bergan. "Real" La Liga turnir jadvalida 75 ochko bilan ikkinchi o'rinni egallab turibdi.
